MMK actueel

Wienpromotie 2018

 

 

Gôjjen daag schöen gezelschap van zangkunstemaëkers,
en auk dae wuiles oet d’n Belgique,

 

Gaer wil ik aan ôch veurstelle, ôzze nieje wienpromotor,Körken Ties.

 

Körken Ties, unne jônge vent van rônd de vieftig jaor, haet zich beej
de wiencommissie aangemeld en haet zich bereid gevônde um d’n wientak
van ’t MMK ens duchtig op te fleure.

 

Hae meldde zich beej ôs preuflokaal, goeide iers d’n hood nao binne um te
kieke wie weej dao op reageerden.
Mazzel det d’n hônd neet los leep.
Hae deed zich van de bein, pakde zich d’n beste praos, die dao stond en
stelde zich veur: ”Ha luuj ik bin Körken Ties, bin gebaore oet de kruutzing
van unne Merlot en unne Riesling efkes achter Eerselsberg, in ein laeg doeës.
Ik zeen det de wiencommissie nog unne gas fijne wiene haet staon.
Moeie wiene, röed en wit, die nog op ut lager ligge.
Te fien um waor te zien, maar zeker de meute waerd is um mit die donkere daag
veur ut eind van ut jaor, saame mit ut maedje d’r nog van kinne geneete.”

 

De wiencommissie stond mit de mônd vol tand det verhaol
van Körken Ties aan te heure:
Verduld daen Ties haet geliek, weej môtte d’r waat aan doon.
Ties doot ôs ein plezeer, wils dich wies aan ut ind van dit jaor,
dich inzette um die prachtige wiene van ut MMK te promoote.
Veur unne gooje pries, wao nateurlik auk ein deil beej zit
veur ut MMK. Idderein kin ein steinke beej draage,
is ut met de kerststökskes, mit ut ald pepeer, de zomermert,
alle kleine bietjes baate.

 

En Ties zag: des good luuj, ik trek, die ker wies dette de
knallers aafgaon,daonoa bekieke weej de doelstelling
van 2019 weer ens duchtig.

 

Enfin hae sprong oppe taofel en declameerde:

 

Beste minse, allemaol in de bleuj van ut laeve, rônd ut eind van ’t jaor
ens moei aaf mit ein roëed en ein wit wienke, d’r zien d’r nog genôg van.
Dus laot gaon dae waage, auk veur die, die nog noeits ein fleske
wien beej ut MMK besteld hebbe.

 

Maak daen haart uns good aan, reukel ens good daor die koole,
goeij ut beerevel d’r veur, ein fijn welske oppe achtergrônd,
zet die fles roeje wien klaor en 2 huele fijne wienglazer en
kiek truuk op ein jaor, saame mit ut maedje, of allein,
wao weer vuel is gebeurd, moei hebbe gezonge en auk leid en
vuel lol mit elkaar is aafgewisseld.
Bestel gerös beej ôs (Joop,John Paul en Ton v.H.) ôch fleske wien
en bedink beej iddere sloek: Morrejen waat is ut ein fijn geveul
um dae wien röstig euver de tông nao binne te kloeke.
Waat bin ik bliej det ik nog kin zinge beej ut MMK.
Wie schoëen, wie schoëen det ik heej woën.
Plök daen daag en laot ôch gaon.

 

Bestel nog gaer veur de fiësdaag ôch wienke,
doot ut snel, want de veurraod kump in de knel,

 

Zet dae witte wien in de keulkas (neet in ut vreervak,
maar lek um in de greuntenbak) en dae roeije wien dae meug
unne daag in de woënkamer staon, ein oor vanteveure efkes
de körk d’r van aaf en röstig inschinke.

 

Körken Ties wins ôch allen van heej aaf unne fijnen truukblik
op ut jaor 2018 en un gezônd 2018
( idderen daag ein klein glaeske wien kumse neet aan de pien)
en kom op zengers van ut MMK bestel och det fleske wien
en geneet d’r van.

 

Körken Ties unne zoon van Zaaten Handrie en Delier Mie.

 

Geboare: in un laeg döes

 

De MMK wiencommissie huert gaer van ôch en winst ôch allemaol
huele fijne fïesdaag ônder ut genot van ein glaeske wien.

 

Bestellinge: beej Paul v.G ,beej John C., beej Joop J. of beej Ton van H.

 

Lettergrootte

Ledenportaal

Uw gebruikersnaam en wachtwoord s.v.p. Als u na het inloggen links onderaan de pagina op de knop Ledenportaal klikt wordt het menu van het Ledenportaal getoond.